ניו יארק – הונדערטער ניו יארק סיטי פאליציי אפיצירן, געקליידעט אין מיליטערישע-סטיל קליידונג און באוואפנט מיט נאגייקעס, האבן אריינגעשטורעמט אין דעם קאלאמביע אוניווערסיטעט קאמפלעקס אויף א דראמאטישן פארנעם נעכטן ביינאכט, אנהייבנדיג ארעסטירן פרא-פאלעסטינער סטודענטן.
שוין מער ווי א וואך וואס פרא-פאלעסטינער סטודענטן אקופירן טיילן פון דעם אוניווערסיטעט, אבער די אוניווערסיטעט פירער האבן זיך אנטזאגט צו נעמען סיי וועלכע שריט זיי אפצושטעלן, אינדערצייט וואס אנדערע אוניווערסיטעטן איבער'ן לאנד האבן יא געטאן זאכן אפצושטעלן די סטודענטן נאכ'ן זען העסליכע פרא-כאמאס סענטימענטן.
דער מצב האט זיך אבער געטוישט ווען די סטודענטן פראטעסטירער האבן זיך באריקאדירט אין דער "העמילטאן האל" געביידע פון דעם קאלאמביע אוניווערסיטעט. דאס האבן שוין די אוניווערסיטעט פירער נישט טאלערירט. זיי האבן דאן געשיקט די ביטע פאר די פאליציי אריינצוקומען און דורכפירן די ארעסטן.
די פאליציי האט אריינגעשטורעמט אויף א דראמאטישן פארנעם אין באגלייטונג פון פארשידענע פאליצייאישע און מיליטערישע טרעקלעך, ארום 9:00 ביינאכט, און ארעסטן האבן זיך גלייך אנגעהויבן. אין אן אפדעיט נעכטן אינמיטן דער נאכט האבן די פאליציי געזאגט אז צענדליגער זענען ארעסטירט.