וואשינגטאן –א מאסיווע טויש איז געמאלדן געווארן פרייטאג איבער טראמפּ'ס איינשווערונג צערעמאניע וואס גייט פארקומען מארגן מאנטאג, אז אנשטאט וואס עס זאל פארקומען אויף דער גאס אויף די שטיגן פארנט פונעם קעפּיטאל געביידע ווי געווענליך, וועט עס פארקומען אינעווייניג אינעם קעפּיטאל אונטער'ן גרויסן קופּאל. דער טויש איז צוליב וואס ס'ווערט פארגעזאגט אז דער וועטער וועט זיין א פראסטיגע 20 דעגרי אינעם וואשינגטאן ראיאן מארגן מיטאג צייט, וואס איז גאר געפארפול. עס איז אויך די קעלטסטע איינשווערונג טאג אין 40 יאר.

לאס אנדזשעלעס – גרויס פארשריט איז געמאכט געווארן דורך די פייערלעשער צו ברענגען מער פון די צוויי גרעסטע וואלדפייערן אינעם לאס אנדזשעלעס ראיאן אונטער קאנטראל. דער פּאליסעידס פייער האט פארצוקט 23,713 אקער-לאנד, וואס קומט אויס 96 סקווער קילאמעטער, און דער איטען פייער האט פארצוקט 14,117 אקער-לאנד, וואס קומט אויס 57 סקווער קילאמעטער. אינאיינעם האבן די צוויי פייערן פארברענט 152 סקווער מייל, וואס איז א שטח גרעסער ווי פּאריז.

וואשינגטאן – די קאנגרעסיאנאלע בודזשעט אפיס האט געשרונקען זייער שאצונג פאר דער אמעריקאנער באפעלקערונג אין דרייסיג יאר ארום, זאגנדיג אז עס וועט דעמאלט האלטן ביי ארום 372 מיליאן איינוואוינער, וואס איז 2.8 פּראצענט שוואכער ווי פאראיאר'ס שאצונג. פאראיאר האבן זיי געשאצט אז אין 30 יאר ארום וועלן וואוינען 383 מיליאן מענטשן אין אמעריקע, אבער האבן רעדוצירט די שאצונג מיט ארום 11 מיליאן, צוליב ווייניגער ערווארטעטע אימיגראציע און רעדוצירטע געבורטן.